რუსეთის უკრაინაში შეჭრა დაგმო რამდენიმე საერთაშორისო გამომცემლობამ: ევროპის გამომცემელთა ფედერაციამ, ევროპელ მწერალთა საბჭომ, იტალიის გამომცემელთა ასოციაციამ და გერმანიის მთავარმა საგამომცემლო სააგენტოებმა.
Börsenverein Group-მა, ორგანიზაციამ, რომელიც მოიცავს ფრანკფურტის წიგნის ბაზრობას და ზედამხედველობს გერმანიის წიგნით ვაჭრობის მშვიდობის პრემიას, გამოაქვეყნა განცხადება და აგრესორ ხელისუფლებას საომარი მოქმედებების შეწყვეტისკენ მოუწოდა:
„მივმართავთ რუს ხალხსა და მათ პრეზიდენტს, შეწყვიტონ ევროპაში მშვიდობისა და თავისუფლების მიზანმიმართული ნგრევა. სოლიდარობას ვუცხადებთ უკრაინელ ხალხს. თქვენ ხართ საერთაშორისო საზოგადოების წევრი, რომელიც მხარს უჭერს ადამიანის ღირსებას, დემოკრატიულ მმართველობასა და საყოველთაო თანასწორობას. თქვენ გაქვთ მშვიდობის უფლება!”
სიტყვიერ მიმართვას სანქციები მოჰყვა.
ფრანკფურტის წიგნის ბაზრობის პასუხი ბალტიის კულტურული ინსტიტუტების ღია წერილზე:
ფრანკფურტის წიგნის ბაზრობის ორგანიზატორები კატეგორიულად გმობენ პრეზიდენტი პუტინის დაკვეთით რუსეთის თავდასხმას უკრაინაზე. რუსეთის ფედერაციის უკრაინაში შეჭრისა და საერთაშორისო სამართლის დარღვევის ფონზე, ფრანკფურტის წიგნის ბაზრობა წყვეტს თანამშრომლობას რუსეთის სახელმწიფო ინსტიტუტებთან – ბაზრობაზე რუსეთის კოლექტიური სტენდი აღარ მოეწყობა. ფრანკფურტის წიგნის ბაზრობა სრულ მხარდაჭერას უცხადებს უკრაინის გამომცემელთა ასოციაციების.
ევროპის გამომცემელთა ფედერაციამ განაცხადა: „უკრაინა არის თავისუფალი ქვეყანა თავისუფალ ევროპაში და აქვს მშვიდობის, დემოკრატიის, უსაფრთხოდ ცხოვრებისა და ტერიტორიული მთლიანობის უფლება. ჩვენ ძალიან გაგვიმართლა, რომ წელს უკრაინა მონაწილეობს ევროკავშირის ლიტერატურულ დაჯილდოებაში. უკრაინა შემოქმედებითი ევროპის ნაწილია, ჩვენი ოჯახის წევრი და გვჯერა, რომ ლიტერატურა მშვიდობის დასამყარებლად ევროპის ყველა მოქალაქეს მრავალფეროვნების მიუხედავად გააერთიანებს.”
თუმცა საერთაშორისო გამომცემელთა ასოციაცია აცხადებს, რომ არ აპირებენ მიმდინარე მოვლენებზე რეაგირებას: “ჩვენ არ ვგეგმავთ, რუს გამომცემლებს განსხვავებულად მოვექცეთ. მათ მიმდინარე ომში ვერ დავადანაშაულებთ. უკრაინელი გამომცემლებიც ჩვენი გულითადი მეგობრები არიან.”
ივან ფედეჩკო, უკრაინის ქალაქ ლვოვში დაფუძნებულ Old Lion-ის საგამომცემლო სახლის დირექტორი საავტორო უფლებების მიმართულებით, წერს: “ახლა, როდესაც ომი ჩვენს სახლშია და მშვიდობიანი მოქალაქეები დაბომბვას თავშესაფრებში ემალებიან, აღარაფერს აქვს მნიშვნელობა ოჯახის, მეგობრებისა და ქვეყნის უსაფრთხოების გარდა. ამისათვის დასავლეთის სწრაფი რეაქცია და ძლიერი მხარდაჭერა უმნიშვნელოვანესია.”
© არილი