Uncategorized

აიოვას უნივერსიტეტის საერთაშორისო სამწერლო პროგრამის ორგანიზებით თბილისს ოთხი მწერალი ეწვევა

აიოვას უნივერსიტეტის საერთაშორისო სამწერლო პროგრამის ორგანიზებით თბილისს ოთხი მწერალი: კრისტოფერ მერილი, ენჯი კრუზი, აიანა მათისი და როზა ალკალა, ეწვევა. ავტორები 28 ივნისიდან 3 ივლისის ჩათვლით მწერალთა სახლში როგორც დამწყები, ისე პროფესიონალი მწერლებისთვის ვორქშოფებს გაუძღვებიან.

პროგრამის (IWP) მთავარი ამოცანა, ძირითადად აიოვას უნივერსიტეტის სამწერლობო რეზიდენციაში ნიჭიერ მწერალთათვის საჭირო სივრცის გამოყოფითა და მუშაობისთვის ოპტიმალური პირობების უზრუნველყოფით, მსოფლიო სხვადასხვა კუთხის ხელოვანების ერთმანეთთან დაკავშირებაა. პროგრამაში მონაწილეობა მიუღია არაერთ ქართველ ავტორსაც.

ამავე წლის 11 აპრილს ოთხივე მწერალმა მონაწილეობა მიიღო “თბილისი – წიგნის მსოფლიო დედაქალაქის” კულმინაციურ ღონისძიება, ონლაინ პანელური დისკუსიაში, სადაც ქართველ კოლეგებთან ერთად განიხილეს მწერალთა გამოწვევები რთულ ეპოქაში.

კრისტოფერ მერილი – ამერიკელი პოეტი, ესეისტი, ჟურნალისტი და მთარგმნელი, აიოვას უნივერსიტეტის საერთაშორისო სამწერლობო პროგრამის დირექტორია.

მისი შემოქმედება, რომელიც მოიცავს 6 პოეტურ კრებულსა და არაერთ არამხატვრულ ნაწარმოებს, ორმოცამდე ენაზეა ნათარგმნი. ფლობს არაერთ ჯილდოს როგორც ორიგინალი, ისე ნათარგმნი ტექსტებისთვის. ხოლო საფრანგეთის მთავრობამ, ფრანგულის კულტურული მემკვიდრეობის გამდიდრებაში შეტანილი მნიშვნელოვანი წვლილისთვის, გადასცა des Arts et des Lettres ორდერი.

 

ენჯი კრუზის მეოთხე რომანი „როგორ არ უნდა დაიხრჩო ჭიქა წყალში“ ამ წლის შემოდგომაზე გამოვა. მისი წინამორბედი წიგნი “დომინიკანა“ კი ქალთა პრემიის მოკლე სიაში მოხვდა და ALA/YALSA-ის პრემია დაიმსახურა.

კრუზი არაერთი ჯილდოს მფლობელი ლიტერატურული ჟურნალ Aster(ix)-ის დამფუძნებელი და მთავარი რედაქტორია. ამჟამად პიტსბურგის უნივერსიტეტში ასწავლის და დაკავშირებულია CAAPP – აფრო-ამერიკული პოეზიისა და პოეტიკის ცენტრთან.

 

როზა ალკალა – პოეტი და მთარგმნელი პატერსონიდან, ნიუ-ჯერსი. თავის უახლეს პოეტური კრებულში „MyOTHER TONGUE“  დედებისა და ქალიშვილების, თავის თავის, როგორც დედას და როგორც ქალიშვილის პორტრეტები დახატა; საკუთარ სხეულთა ურთიერთობისას, მენსტრუაციისას, მშობიარობისას თუ ძუძუთი კვებისას აღძრული განცდები აღწერა.

„ალკალას მოკლე, მღელვარე სტრიქონები, უცაბედი გაჩუმებები და თავისუფლად დატოვებული სივრცეები გვახსენებს, თუ რაოდენ იშვიათად წერენ გულწრფელად ამ თემებზე, მამებისა და ვაჟების ურთიერთობის ეპიკური ტრადიციის საპირისპიროდ,” – ვკითხულობთ The New York Times-ის რეცენზიაში

 

აიანა მათისის პირველი რომანი The Twelve Tribes of Hattie (Knopf, 2012) The New York Times-ის ბესტსელერად იქცა და  წლის საუკეთესო პროზაულ ნაწარმოებთა არაერთ სიაში მოხვდა. მისი არამხატვრული ლიტერატურა იბეჭდება ისეთ პრესტიჟულ გამოცემებში როგორიცაა: The New York Times, The Atlantic, Rolling Stone Magazine, Guernica.

მათისი ამჟამად უძღვება Black Arts Dialogues სერიებს, რომელსაც კოლუმბიის უნივერსიტეტის აფრო-ამერიკული და აფრიკული დიასპორული კვლევების დეპარტამენტი მასპინძლობს. ამავდროულად მეორე რომანზე მუშაობს.

 

პროექტის ფარგლებში სამი ვორქშოფის ჩატარება იგეგმება, მაქსიმუმ 10-10 კაცისთვის. თითოეული  2-3 დღე გასტანს და დაახლოებით 2-3 საათს გაგრძელდება:

  • ახალგაზრდა მწერალთა ვორქშოფი (16-25 წლის დამწყები მწერლებისთვის);
  • პოეზიის თარგმანის ვორქშოფი (პოეზიის ინგლისურიდან მთარგმნელებისთვის);
  • მხატვრული წერის ვორქშოფი (ავტორებისთვის ერთი ან მეტი გამოცემული წიგნით).

მონაწილეობის სურვილის შემთხვევაში შეავსეთ ფორმა 20 ივნისის 18:00 საათამდე.

© არილი

Facebook Comments Box