ესაუბრა გუგა მგელაძე
,,საბას” ფინალისტების სია უკვე ცნობილია. „წლის საუკეთესო ქართული თარგმანის“ ნომინაციის ფინალისტების ვინაობა კი მოგვიანებით, აგვისტოში გახდება ცნობილი.
რომანის ნომინაციის ერთ-ერთ ფინალისტს რამდენიმე შეკითხვით მივმართე. ილია ჭანტურია პრემიის მნიშვნელობასა და მოლოდინებზე გვესაუბრება.
რას ნიშნავს თქვენთვის ,,საბას’’ ფინალისტობა და როგორი მოლოდინები გაქვთ?
ყოველი ლიტერატურული პრემია სტიმულია მაინც ავტორისთვის, ნომინანტობაც, რა თქმა უნდა. არის ფინანსური საკითხიც. გამომდინარე იქიდან, რომ აქ მწერალი თავისი საქმიანობით ვერ იღებს ანაზღაურებას, ეს ერთადერთი საშუალებაა ფინანსური მხარდაჭერის მიღების. ზოგადად, რაც ყველაზე ნათლად ჩანს, ბაზარზე შრომადაც კი არ აღიქმება ხოლმე წერა, არადა ეს არის ინტელექტუალური შრომა, რომელსაც დიდი ძალისხმევა სჭირდება. მოლოდინის მხრივ ვერაფერს ვიტყვი, რაც არ უნდა ითქვას, ჟიურის გადაწყვეტილება მაინც სუბიექტურია, რომლის ამოცნობაც რთულია.
როგორ აფასებთ წლევანდელ მოკლე სიას? არიან მწერლები, რომლებიც იმსახურებდნენ სიაში მოხვედრას?
ამ წელს ახალ გამოცემულ წიგნებს არ გავცნობივარ და სხვა ნომინანტებზე ვერაფერს ვიტყვი, მაგრამ ყველაზე მეტად, რომელი წიგნიც დამაკლდა იყო ცოტნე ავსაჯანიშვილის “ბავშვები კორტესარის მთიდან” დებიუტის ნომინაციაში. თუმცა პრემია ლიტერატურის ხარისხს სრულად მაინც ვერ განსაზღვრავს, ამ წიგნს ეყოლება თავისი მკითხველი, რომელიც თბილისის გარეუბნებში, გამოგონილ ქალაქებში, თუ რეგიონებში იხეტიალებს იმ ბავშვებთან ერთად, ყოველთვის რაღაცას რომ აშავებენ. ბავშვებმა უნდა დააშავონ, სამართლიანია!
© არილი