ახალი ამბები

დიანა ანფიმიადის კრებული The Guardian-ის ,,საუკეთესო თანამედროვე პოეზიის” ხუთეულშია

 

დიანა ანფიმიადის პოეზიის კრებული “რატომ აღარ ვწერ ლექსებს” (Why I No Longer Write Poems) The Guardian-ის ,,საუკეთესო თანამედროვე პოეზიის” ხუთეულშია.

კრებული ინგლისურ ენაზე პოეზიის მთარგმნელობითი ცენტრის პროგრამის ფარგლებში ითარგმნე, რომელიც მიზნად ისახავს აზიის, აფრიკისა და ლათინური ამერიკის გამორჩეული პოეზია გააცნოს ინგლისურენოვან მკითხველს. პროექტი ბრიტანელ პოეტებს ლიტერატურულ მთარგმნელებთან აკავშირებს. დიანა ანფიმიადის კრებულზე ჯინ სპრაკლანდმა და ნატალია ბუკია-პეტერსმა იმუშავეს. „რატომ აღარ ვწერ ლექსებს“ წამყვანმა ბრიტანულმა გამომცემლობამ Bloodaxe Publication-მა ქართულ და ინგლისურ ენებზე გამოსცა. ხოლო თარგმანმა ამერიკული „PEN Translates“-ის პრესტიჟული ჯილდოც დაიმსახურა.

ეპიკური პოეზიის კრებული მითოლოგიას ეროვნულ კონტექსტში აცოცხლებს. The Guardian დიანა ანფიმიადის შემოქმედებას მომნუსხველსა და ზღაპრულს უწოდებს, მისი წერის სტილი მუდმივი მოძრაობის განცდას უქმნის მკითხველს. ხოლო The Calvert Journal-მა, რომელიც აღმოსავლეთ ევროპისა თანამედროვე კულტურის პოპულარიზაციას ისახავს მიზნად, პოეტური კრებული 2022 წელს წასაკითხ წიგნთა ათეულში შეიყვანა სიტყვებით: „ფორმალური დიაპაზონისა და დივერსიულების დემონსტრირებით, ანფიმიადი კლასიკურ სახეებსა და მითებს თანამედროვე ტექნიკასთან აერთიანებს გააფართოებს პოეტური ფორმის საზღვრებს.“

ქართველ პოეტთან ერთად The Guardian-ის „საუკეთესო თანამედროვე პოეზიის“ სიაში მოხვდნენ:

ცნობილი ამერიკელი პოეტის კარლ ფილიპსის „და შემდეგ ომი“ (Then the War: And Selected Poems 2007-2020). ავტორის რჩეული ლექსების 208 გვერდიანი კრებული, რომელიც თანაბრად საინტერესოა როგორც მისი 30 წლინი კარიერის ერთგული მკითხველისათვის, ისე ფილიპსის შემოქმედებით ახლახან დაინტერესებულთათვის. ლექსები ძირითადად ეკოლოგიური ხასიათისაა: ალაპარაკებს ფოთლებსა და ხეებს, რითაც საშუალებას გვაძლევს უკეთ შევიცნოთ ბუნება ჩვენს გარშემო.

ბრიტანელი მოდერნისტი პოეტის დენის რაილის „Lurex“ რეალურ გამოცდილებებსა და ემოციების სამყაროს თანაბრად მოიცავს. პოეტურ კრებულში მკითხველი ბიბლიური ამბების ახლებურ გადააზრებებთან ერთად ავტორის ცხოვრებისეულ ისტორიებსაც შეხვდება.

ფიონა ბენსონის „Ephemeron“ პოეტის უჩვეულო დიაპაზონს წარმოაჩენს: „მწერთა სასიყვარულო სიმღერა“ ეკოლოგიურ თემაზე შექმნილი ლექსებია, რომელსაც კონფესიური პოეზია და ბერძნული მითები მოსდევს. კრებულს ფემინისტური თემატიკა და სკოლა-ინტერნატის ამბები აგვირგვინებს.

იამაიკის ლაურეატი პოეტი ოლივ სინიორი კრებულში „Hurricane Watch: New and Collected Poems“ ტრადიციულად კულტურულ თემებსა და მიკუთვნებულობის განცდას უტრიალებს. აღწერს ემიგრირებული მწერლის თავგადასავალს საკუთარი თავის ძიების გზაზე, რომლის ფონზეც აფრიკული ღმერთების მთელ პანთეონს აცოცხლებს.

 

© არილი

Facebook Comments Box